Mann wæs fram Gode asend, þæs nama wæs Iohannes. Ðes com to gewitnesse, þæt he gewitnesse cyðde be ðam leohte, þæt ealle menn þurh hyne gelyfdon. Næs he leoht, ac þæt he gewitnesse forð bære be þam leohte. Soð leoht wæs þæt onlyht ælcne cumendne man on þisne middaneard.
He wæs on middanearde, and middaneard wæs geworht þurh hine, and middaneard hine ne gecneow. To his agenum he com, and hig hyne ne underfengon. Soðlice swa hwylce swa hyne underfengon, he sealde him anweald þæt hi wæron Godes bearn, þam ðe gelyfað on his naman: ða ne synt acennede of blodum, ne of flæsces willan, ne of weres willan, ac hig synt of Gode acennede. And þæt Word wæs flæsc geworden, and eardode on us, and we gesawon hys wuldor, swylce acennedes wuldor of Fæder, þæt wæs ful mid gyfe and soðfæstnysse.